Breaking

Monday, 6 May 2019

چاند دیکھنے کا بیان

                                       چاند دیکھنے کا بیان


                                                           👇 1مسئلہ

اگر آسمان پر بادل ہے یا غُبار ہے اِس وجہ سے چاند نظر نہیں آیا لیکن ایک دیندار پرہیزگار سچے آدمی نے آکر گواہی دی کہ میں نے رمضان کا چاند دیکھا ہے تو چاند ثابت ہو گیا
 چاہے وہ مرد ہو یا عورت ہو 

                                                           👇 مسئلہ2 

اگر بدلی کی وجہ سے عید کا چاند نہ دکھائی دیا تو ایک شخص کی گواہی کا اعتبار نہیں ہے چاہے جتنا بڑا معتبر آدمی ہو بلکہ جب دو۲ معتبر اور پرہیزگار مرد یا ایک دیندار مرد دو۲ دیندار عورتیں اپنے چاند دیکھنے کی گواہی دیویں تب چاند کا ثبوت ہوگا - اور اگر چار عورتیں گواہی دیں تو بھی قبول نہیں -

                                                              👇3مسئلہ

جو آدمی دین کا پابند نہیں برابر گناہ کرتا رہتا ہے مثلًا نماز نہیں پڑھتا یا روزہ نہیں رکھتا یا جھوٹ بولا کرتا ہے یا اور کوئی گناہ کرتا ہے شریعت کی پابندی نہیں کرتا تو شرع میں اسکی بات کا کچھ اعتبار نہیں ہے - چاہے جتنی قسمیں کھاکر کے بیان کرے بلکہ ایسے اگر دو تین آدمی ہوں انکا بھی اعتبار نہیں -

                                                             👇 4مسئلہ

یہ مشہور ہے کہ جس دن رجب کی چوتھی اُس دن رمضان کی پہلی ہوتی ہے شریعت میں اس کا بھی کچھ اعتبار نہیں ہے اگر چاند نہ ہوتو روزہ نہ رکھنا چاہیے 

                                                             👇5مسئلہ 

چاند دیکھ کر کہنا کہ چاند بہت بڑا ہے کل کا معلوم ہوتا ہے بری بات ہے حدیث میں آیا ہے کہ یہ قیامت کی نشانی ہے جب قیامت قریب ہوگی تو لوگ ایسا کہا کریں گے - خلاصہ یہ کہ چاند کے بڑے چھوٹے ہونے کا بھی کچھ اعتبار نہ کرو نہ ہندوؤں کی اس بات کا اعتبار کرو کہ آج دوئج ہے آج ضرور چاند ہے شریعت سے یہ سب باتیں واہیات ہیں-

                                                              👇6مسئلہ

اگر آسمان بالکل صاف ہو تو دو چار آدمیوں کے کہنے اور گواہی دینے سے بھی چاند ثابت نہ ہوگا چاہے رمضان کا چاند ہو چاہے عید کا البتہ اگر اتنی کثرت سے لوگ اپنا چاند دیکھنا بیان کریں کہ دل گواہی دینے لگے کہ یہ سب کے سب بات بناکر نہیں آئے ہیں اتنے لوگوں کاجھوٹا ہونا کسی طرح نہیں ہوسکتا تب چاند ثابت ہوگا -

                                                              👇7مسئلہ

شہر بھر میں یہ خبر مشہور ہے کہ کل چاند ہوا بہت لوگوں نے دیکھا لیکن بہت ڈھونڈا تلاش کیا پھر بھی کوئی ایسا آدمی نہیں ملتا جس نے خود چاند دیکھا ہو تو ایسی خبر کا کچھ اعتبار نہیں ہے -

                                                              👇8مسئلہ

کسی نے رمضان شریف کا چاند اکیلے دیکھا سوائے اسکے شہر بھر میں کسی نے نہیں دیکھا لیکن یہ شرع کی پابند نہیں ہے تو اسکی گواہی سے شہر والے تو روزہ نہ رکھیں لیکن خود یہ روزہ رکھے اور اگر اس اکیلا دیکھنے والے نے تیس روزے پورے کر لئے لیکن ابھی عید کا چاند نہیں دکھائی دیا تو اکتیسواں روزہ بھی رکھے اور شہر والوں کے ساتھ عید کرے -

                                                             👇9مسئلہ 

اگر کسی نے عید کا چاند اکیلے دیکھا اس لئے اس کی گواہی کا شریعت نے اعتبار نہیں کیا تو اس دیکھنے والے آدمی کو بھی عید کرنا درست نہیں ہے صبح کو روزہ رکھے اور اپنے چاند دیکھنے کا اعتبار نہ کرے اور روزہ نہ توڑے -         

No comments:

Post a Comment